Aizawl 10th June, 2024 (Mon): Vawiin khan Chief Minister Lalduhoma hovin Minister te, Advisers to CM te leh Mizoram sawrkara Jt. Director chin chunglam zawng zawng leh DC leh SP zawng zawng te telna Inter Departmental Meeting chu Dawrpui Multi Purpose Hall ah neih a ni.

Lalduhoma chuan thusawiin, "Kalphung thar, mipui sawrkar din tum kan ni a. Chumi kawngah chuan nangni sawrkar hnathawkte hi sawrkar ruhrel (steel frame of Mizoram) te in ni. Thinlung hrisel tak pu chunga tun hmaa kan lo tih theih ngai loh te pawh tithei, a tha zawnga kan ram thlak thleng thei nih tum turin kan duh che u a ni."

"Tuna kan kal mek dan aia tha zawk kal dan tur in hriat phawt chuan ziakin ka hnenah rawn thlen ang che u. A thehluttu hming ziah kher pawh a ngai chuang lo, kan duh chu kal dan tur tha zawk hriat kha a ni, a ti. Mizoram First tih hi kan thupui a ni a, thil tha lo hnawl ngam, a tul huna "No" ti ngam kan mamawh che u. Mipuite rawngbawltu kan nih angin an tan awlsamna kan chhawpchhuah thiam a ngai a. Lang tlang sawrkar neih ngei kan duh a, conduct rules leh dan kan zawm ngai te zawm chungin sawrkar policy ah kan rinawm tur a ni."

" Thuruk vawn ngai te kan vawng ang a, dan chunga leng tumah kan awm loh avangin hnathawktuten tha takin dan kan zawm theuh dawn nia. Sawrkar hnathawk social media lama hming lem invuaha conduct rules bawhchhia an awm pawhin kan umzui zel dawn a, confidential document thehdarh chenin kan pumpelh a ngai a ni.  Kan sawrkar hian mipuite aw ngaihthlak zel a duh avangin "Mipui Aw" online kan nei a; CM office atangin kan lo vil reng a, a mawhphurtuten tha takin lo kalpui ang che u."

" Eirukna tihbo kan duh a, sawrkar hnathawk leh consultancy firm inthurual te, supplier thurualpui neih te hi eirukna bul a ni fo, kan khauh hle dawn. Sawrkar hnathawkten Annual Property Returns a hun takah file ngei ngei tur a ni a, a tel lovin vigilance clearance kan pe dawn lo. Hnathawh quality tha chauh neih kan tum avangin Project Monitoring Committee chak tak kan nei a, officer zawng zawng ten tha takin in lo thawhpui dawn nia. Project zawng zawng hi CM Dashboard hmangin kan rawn endik (monitor) vek tawh dawn a, tumah inthlahdah theih a ni dawn tawh lo."

"Hna reng reng Administrative Approval, Expenditure Sanction leh Work Order awm lovin tuman lo thawh tawh loh tur a ni. Chutiang ti an awm chuan sawrkarin kan umzui lovang. Departmental work reng reng a changtu Minister phalna la hmasa lova thawh phal a ni lo. Department ten eng project pawh kalpui tum ula Planning leh Finance department kaltlang lova proposal thehluh phal a ni lo. K deposit ah pawisa dah a tam em em a, kum 3 leh a aia upa k deposit reng reng department ten lo ching fel thuai turin kan duh che u a ni."

 "Tin, sawrkar hnathawk semrual dan pawh kan dap mek a, allocation of business pawh siam that kan tum. Service inepna (Rivalry) nasa lutuk hi hriat hrehawm kan ti a, hei hian kan thawhhona a tichhe nasain kan hria a ni", a ti.

"Hand Holding Policy kalpui turin kan inbuatsaih mek a, a dawngtu tur te hi beneficiary kan ti ve dawn lova business partner kan ti dawn a ni. A hlawhtlin nan Line department ten mawhphurhna sang tak in nei dawn a, partner pawh hi duhsak bik nei lova a hlawhtling thei turte chauh thlan tur a ni," tiin sawrkar flagship policy kalpui dan te pawh a tarlang a ni. Heng bakah hian sawrkar duhdan thil pawimawh hrang hrang a sawi bawk.

Chief Minister thusawi kimchang hi www.dipr.mizoram.gov.in ah leh a mimal social media account ah te dah chhuah a ni.

He hunah hian Home Minister Pu K. Sapdanga leh Minister dang te leh Adviser to CM ten thusawina hun an hmang a. Chumi hnuah official kal khawm te nen hian inkawmhona an nei zui a ni.

Inkawm khawmna hi Pu Pratap Chhetri, Deputy Director, I&PR chuan a host-a, kal khawmte lawmna thu Dr. Renu Sharma, IAS, Chief Secretary chuan a sawi a. Sawrkar thar duhdan leh hmalakna te, a ruahmanna tlangpui te a sawi a. Sawrkar hnathawk kal tura beisei te tha taka an kal avangin lawmthu a sawi.